⛎Бір хадисте «От ағашты қалай өртеп жіберетін болса, қызғаныш та жақсы амалды солай жалмап жояды» делінеді. Адам уақытын, энергиясын сарп етіп ынты-шынтысымен ізгі іс жасайды. Алайда әлдебіреулердің қолындағы нығметке қарап қызғанышы оянса, жасаған жақсылықтары жойылуы ықтимал. Дер кезінде емдемесе қызғаныш тек көреалмаушылықпен шектелмей, адамдардың жақсылығын көрмейтіндей дәрежеде асқынады.
⠀
⛎Мысалы қызғаншақ адам біреудің қолындағы дүниесін, берген садақасын, өзге де жақсылықтарын қызғанса, өзі де жасаған жақсылығынан ләззәт ала алмай, стреске түседі. Стрестік жағдайда жүргендіктен жасаған жұмысы берекесізденіп, үнемі әлгі адамның дәрежесіне жетем деп күш-қуатын ысырап етеді. Осылай өзін іштей жеп тынады. Мұндай жағдайда адамнан жан тыныштығы кетеді.
⠀
⛎Екіншіден, адамдардың қолындағы нығметті қызғанудың астарында мынадай пиғыл жатады, әдетте. «Құдай неге оған береді, неге маған бермейді. Менің одан қай жерім кем?» Бұл қауіпті нәрсе. Жаратушының пешенесіне жазған тағдырына наразылық білдіру – бұл Оған қарсы әдепсіз іс болады. Себебі бұл тағдырға риза болмау ғана емес, Құдайдың адресатына сын айту. Есті адам мұндай нәрседен сақтанады.
⠀
⛎Енді қызғаныштың осы өмірде беретін зиянын бағамдап көрейік. Қызғанышын жеңе алмаған адам бірінші кезекте өзін-өзі іштей шірітеді, жүре келе ауруға шалдығады. Рухани жай-күйі де мәз болмайды, себебі қызғанышы асқынған адамның ұйқысы тыныш емес.
⠀
⛎Жарыс не байқауға қатысқан адам қызғаныштың себебінен әрекеттері ретсіз боп, сәтсіздікке ұшырайды. Білім саласында да солай. Ғылымда тереңдеп, алға озып бара жатқан әріптесін қызғанам деп өзі де бар қабілетін дұрыс қолдана алмай қалады. Себебі қызғаныш жақсылықты жояды, ең кемі күшін әлсіретеді. Қысқасы қызғаныш кез келген жақсылықтың жауы.